Hier kom ik weg: ‘Wat is der mooier as mèensen advies geven in heur eigen taol?’

De rubriek Hier kom ik weg giet over Drenthe, heur inwoners en heur verhalen. Illustratie: Dagblad van het Noorden

De rubriek Hier kom ik weg is een samenwarking met het Huus van de Taol en giet over Drenthe, heur inwoners en heur verhalen. Ronald Knegt is strafrechtadvokaot en sprek veur ‘t wark miesttieds Nederlands, maor hij schakelt net zo makkelijk um naor het Drèents.

,,Ik wark op een echt Drèents kantoor, met de poten in de klei, um het zo te zeggen. Wies doen past oes niet.” Ronald Knegt (28) prat dan ok geregeld Drèents met cliënten of aandere mèensen die as juridisch advies komt vraogen.

De jonge Asser advocaat gruit twietaolig op. ,,Mien olders preuten wal Drèents tegen mekaar, maor tegen mij en mien zussie deden ze dat bewust niet, umdat zij wolden dat wij goed Nederlands leerden. Maor wij waren alle woensdagen bij mien opa en oma in Noordscheschut en daor preuten wij allent maor in de streektaol. Wij logeerden der ok vaak en gungen met ze op vekaansie.”

In de supermarkt in Hoogeveen waor Knegt op zien 14 e een bijbaantie kreg, komp de streektaol ok van pas. ,,Een aantal klanten preut allent maor Drèents, dan dee ik dat ok.”

loading  

Strafzaken bekieken

Dat e advokaot worden wil, wet e dan nog niet. Dat komp pas as e rechten studeren giet in Grönning. Knegt löp stage bij een advokaotenkantoor en bij de Kinderrechtswinkel, waor kinder en jongern tot 21 jaor met juridische vraogen terecht kunt.

Ok bezöch e haost alle vrijdagen de rechtbank in Grönning um te kieken bij strafzaken. ,,Ik keek welke advokaoten leuk pleitten en welke het minder deden.” Nao een master Jeugdrecht in Leiden wordt Knegt in 2018 vraogd um bij Rechtshulp Advocaten in Assen an ‘t wark te gaon.

‘Wat veur kerel is dat?’

,,Ik mark nou dat het Drèents mij weer geregeld van pas komp. Mèensen die oppakt bint en de streektaol spreekt, vindt nooit vrumd da’k naor het Drèents umschakel. De eerste keer da’k dat hier op kantoor dee, was ien van de collega’s wal wat verbaosd”, lacht e.

,,Oes kantoor hef ok spreekuren in bibliotheken in bijveurbeeld Hoogeveen, Emmen en Veendam. Mèensen kunt daor veur gratis juridisch advies kommen. Wat heb ik der dan an a’k daor in dreidielig kostuum Nederlands gao praoten met iene die as altied Drèents prat?
Dan denkt e lichtkaans: wat is dat veur ‘n kerel en wat giet mij dat wal niet kosten?”

Vertrouwen

,,A’k praot in de taol die veur mien gesprekspartner het best vuult, vertelt e mij veul eerder wat zien probleem is. Ik kan hum pas goed advies geven as e mij alles vertelt. Het dreit um vertrouwen.”

Knegt döt, net as zien kantoorgenoten, strafzaken deur het hiele laand. ,,Met Franse of Marokkaanse cliënten begun ik ok altied eerst zölf Frans te praoten, veurda’k een tolk bel. Ik vind het belangriek um eerst zölf contact te maken. Wat is der mooier as mèensen advies geven in de taol die het dichtst bij heur stiet? Welke taol dat is, mak mij niks oet.”

menu