Hier kom ik weg: ‘Je afkomst moej niet verloochen’

Roelie Lubbers-Hilbrands. Foto: Ernstjan van Dam

De rubriek Hier kom ik weg is een samenwarking met het Huus van de Taol en giet over Drenten en heur verhalen. Roelie Lubbers-Hilbrands oet Noord-Slien was jaorenlang topvrouw bij accountantskantoren in Drenthe en Grunning. Naost heur wark hef ze ok altied drok west. Zo is ze veurzitter van wielercriterium De Gouden Pijl, zit ze in de Zuidenveldcommissie van Slien en is ze bestuurslid van het Huus van de Taol.

loading  

,,Ik heb mij nooit kunnen veurstellen dat mèensen met tegenzin naor heur wark gaot. Dat heb ik nooit had”, zeg Roelie Lubbers an de keukentaofel in Noord-Slien. Ze warkt nou noodgedwungen in hoes en dat bevalt heur een stuk minder, want ze giet geern op pad. Ambitie en neisgierigheid hebt heur veul bracht.

Vrogger, thuus op de boerderij, weur der Drèents praot en dat dee Lubbers ok met vriendinnegies. Vanof de middelbare schoel weur het meer Nederlands, maor het Drèents is ok altied bleven. ,,Allent in mien wark as accountant vun ik het lastig. Ik har eerst het idee da’k ‘netjes Nederlands’ praoten mus. Asof Drèents niet netties is. Dat is de grootste kul die der bestiet vanzölf”, zeg ze.

‘Wieder in ’t Drèents’

,,Toen ik in de jaoren ’90 as assistent-accountant bij KPMG bij bedrieven in gesprek mus met magazienmetwarkers en de veurraoden mus controleren, har ik rap in de gaten dat het veul prettiger warkte as ik gewoon Drèents praotte in het magazien.”

Toch weur ze ok wal ies verrast. ,,Ik heb een keer het Drèents dictee wunnen en dat hef in de kraant staon. Niet lang daornao gung ik met een Drèentstaolige collega hen een klant. Wij mussen even wachten, umdat de directie Engelse gasten op bezuuk har. Toen die weg waren, zee ik: ‘Nu kunnen we verder in het Nederlands.”

Daor dacht de directeur aans over. ,,‘Wij gaot wieder in ’t Drèents’, zee e. ‘Wij hebt lezen daj dat hiel goed kunt. Nou wij ok, dus dat komp mooi oet’.” Lubbers lacht hardop. ,,Vanof dat moment he’k daor altied Drèents praot.”

Neie oetdaging

Ok al hef ze in de regionale top van KPMG, Ernst & Young, BDO en as leste Deloitte zeten, klanten bezuken heurde der altied bij en dat vun Lubbers ok het mooiste. ,,Daj as accountant allent de ciefers controleert, klopt niet. Je controleert veural de systemen waormet bedrieven warkt en hoe alles organiseerd is.”

In 2018 stopt ze as partner en regiodirecteur van Deloitte. Tied veur een neie oetdaging. Tegenwoordig hef ze heur eigen bedrief RLH Advies en zit ze bij een aantal bedrieven in raden van toezicht en commissarissen, zoas bij RTV Drenthe, Interzorg Noord en netbeheerder Cogas in Twente. Naost dat wark is Lubbers strategisch en financieel adviseur bij een aantal bedrieven.  

Cultuur

Ze is ok al lange tied betrökken bij de plaotselijke Zuidenveldcommissie in Slien en bij het Huus van de Taol. ,,Ik hol van het regionale en vind het mooi dat meer mèensen kennismaakt met het Drèents. Het heurt bij oeze cultuur. Je afkomst moej niet verloochen.”

As anjager van de Culturele Gemeente Coevorden stiet cultuur bij heur momenteel op de veurgrond. Eind augustus begunt het culturele jaor. De locatietheaterveurstelling Woeste Gronden in ’t Haantje is begun september de eerste activiteit. ,,Ik haal veul voldoening oet plannen maken. Wij moet kieken wat wál kan. De coronacrisis mak mèensen ok creatief.”   

Je kunt deze onderwerpen volgen
Drenthe
menu