Hier kom ik weg: ‘Drèents is van vandaag, het is gien taol van vrogger’

Hier kom ik weg

De rubriek Hier kom ik weg is een samenwarking met het Huus van de Taol en giet over Drenthe, heur inwoners en heur verhalen.  Renate Snoeijing (44) oet Emmen was as kind al goed in taolen. De toeristische sector paste heur geweldig, maor sinds een jaor zöch ze het dichter bij hoes; bij ‘het Huus’ in heur geval.

Zie is beslist niet de neie Jan Germs. Renate Snoeijing is totaal aans as heur veurganger, op ien ding nao: de liefde veur het Drèents. Ze is der vrogger in Witteveen met opgruid. ,,Het is echt mien moedertaol, die taol hef der altied west.”

Op de Nationale Hogeschool Toerisme en Verkeer in Breda komp heur taolenknobbel goed van pas. Veur ze daor op heur 19 hen giet, warkt ze eerst een jaor as au pair in Parijs. Het verschil met Witteveen kán haost niet groter, maor Snoeijing zöt avontuur. Heur oma is niet zo bliede. ,,Die vun Breda al zo wied vort. Toen ik over Parijs begunde, zee ze dat ik op mus holden met die grappies.”

‘Gien gladde verkoper’

In de toeristische sector, waor ze jaorenlang warkt, is ze drok met sales en marketing. Ze döt under meer het in- en verkopen van reizen. As ze veurig jaor de vacature veur directeur bij het Huus van de Taol zöt, hef ze gien idee wat of ze daor in Beilen doet. ,,Oet pure neisgierigheid klikte ik derop. Al gauw vun ik het interessant. Ze zöchten ok iene met ervaring in het bedriefsleven en dan an de promotiekaant.”

loading

Allewal heur wark in Beilen hiel aans is as veurige banen, bint der ok dingen hetzölfde. ,,Of ik nou Drèents in de markt zet of vekaansies; het truukie is hetzölfde. Ik zuuk ok nou de grèens met het commerciële wal op. Maor een gladde verkoper bin ik nooit west. Ik hol van relaties opbouwen met een eerlijk verhaal.”

Kreet op de container

,,Wat ik belangriek vind, is dat wij het Drèents neerzet as iets van vandaag. Het is gien taol van vrogger. Hiel veul mèensen spreekt het.” De taol en cultuur op allerlei manieren an de man brengen, is heur doel. ,,Wij hebt nou een actie waorbij mèensen een kreet moet bedèenken veur op heur container Hiel simpel, maor via de media en de sociale media bereik wij der hiel veul mèensen met.”

,,Niet alles huuft diepgaond te wezen. As mèensen oes eerst maor weet te vinden, kunt ze dan wal zien wat wij nog meer doet, zoas boeken en tiedschriften oetgeven en underwiesprojecten opzetten.” Der bint plannen veur online taolcursussen en een Drèntse podcast zul niet misstaon, vindt Snoeijing.

Meertaoligheid

Ok is der een neie website. ,,As mèensen niet weet wat aj doet, gaot ze eerst op de site kieken. Der is ok een Nederlandstaolige versie. Dat mak veur veul mèensen de drempel net wat leger en wij bint online beter vindbaar.”

Het is niet óf Nederlaands óf Drèents. Beide taolen staot naost mekaar, is heur overtuging. ,,Het dreit tegenwoordig um meertaoligheid. Mien dochter van 8 jaor heurt bijveurbeeld Drèents van heur opa’s en oma’s en van mij, maor heur pap prat Nederlaands met heur, net as mien vriendin. Ze begrep beide taolen en gebroekt zölf aal meer Drèentse woordties. Heur ik op de fiets naost mij opiens: ‘Kiek oet, mam!’ Prachtig vind ik dat.”

menu