Hier kom ik weg: 'Alles oet jezölf halen wat derin zit'

Peter Snijders oet Daoln is haost anderhalf jaor burgemister van Zwolle. Toch is e nog altied Drent en hart en nieren en trots op zien Daoler roots.

De rubriek  Hier kom ik weg  is een samenwarking met het Huus van de Taol en giet over Drenten en heur verhalen. Peter Snijders oet Daoln is haost anderhalf jaor burgemister van Zwolle. Daorveur was e dat in Hardenbarg. Toch is e nog altied Drent en hart en nieren en trots op zien Daoler  roots .

loading  

,,Ik was met een groepie mannen oet Daoln an het mountainbiken toen ik beld weur deur de officier van justitie. Of ik hen Zwolle kommen wol, want het was hiel groot, veul slimmer as ze dacht hadden.” In september 2019 is Peter Snijders (54) nog gien week burgemister in Zwolle of der is al een schietpartij.

Op de plek des onheils – de neibouwwiek Stadshagen - prat e met bewoners die arg schrökken bint van de kogelregen in heur wiek. ,,Bij ien gezin stun de bank precies in de baan van een kogel. Een wonder dat daor gieniene raakt is.”

Zwaailochtsyndroom

Onacceptabel, vindt Snijders, en samen met politie en justitie beslöt e dat der stevig ingrepen worden möt. Der bint oeteindelijk zwaore criminelen oppakt en de rust is weerkeerd. Deur zien optreden stiet e in Zwolle te boek as crimefighter. ,,Maor ik bin annummen um Zwolle te laten gruien van 130.000 naor 160.000 inwoners”, legt e oet. ,,Veiligheid was niet zu’n groot thema, maor dat veraanderde opiens.”

Ok al hef zien hart, as VVD-lid en zeun van een Daoler undernimmer, altied bij economie legen, Snijders hef naor eigen zeggen ok een zwaailochtsyndroom. ,,Politie en braandweer he’k altied geweldig vunden. Daorum bin ik mien loopbaan begund op het ministerie van Binnenlandse Zaken bij de politie.”

Na veer jaor De Wolden, acht jaor Hardenbarg en nou Zwolle is het hard gaon met zien burgemistersloopbaan. ,,Ambitie vind ik belangriek. Dat mis ik in Drenthe wal ies. Veul mèensen hebt de neiging um het al gauw goed te vinden. Ik vind daj oet jezölf moet halen wat derin zit. Ie kunt vaak meer as daj denkt.”

loading  

Gresmèeien

Snijders komp geregeld in Drenthe. Zien pap (93) woont in Daoln en hij fietst er geern. Meesttieds woont e met zien gezin in een appartement in de Zwolse binnenstad, maor zie hebt ok een hoes op Holthone. Een plek um tot rust te kommen. ,,Ik ontspan deur boeten gangs te wezen. Lekker op mien John Deere het gres mèeien.”

,,Het is een hiel bijzundere tied um burgemister te wezen, deur het coronavirus. Opiens komp de naodruk veul meer op de veiligheidsregio te liggen, waor ik veurzitter van bin.” As veurzitter van de Veiligheidsregio IJsselland hef e veul belangrieke besluten nimmen moeten.

Naoberschap

Snijders blef nuchter. ,,Ik probeer leegdrempelig te blieven, al mark ik wal dat dat in Zwolle lastiger wordt. Der komt zoveul op je of. Ik moet deran wennen dat mèensen tegen mij opkiekt. Daor hol ik hielemaol niet van.”

Hij vuult zuch thuus in Zwolle, umdat het een ambitieuze gemiente is. ,,Maor juust ok umdat naoberschap der hiel belangriek is, net as in Drenthe. Of ik mij meer Overiesselaar vuul as Drent? Ik wark langer in Overiessel, maor ik heb wel leerd daj nooit moet vergeten waor aj weg komt. Daoln hef altied een liberaal dörp west, waor naoberschap belangriek was. Mien roots ligt daor en het hef bepaald hoe ik in het leven stao. Daor bin ik trots op.”  

Zaoterdag lees ie meer over Peter Snijders in de bijlage WKND van DvhN.

Je kunt deze onderwerpen volgen
Drenthe