Hier kom ik weg: 'Een leven zunder de brandweer kan ik mij niet veurstellen'

Hier kom ik weg

De rubriek  Hier kom ik weg  is een samenwarking met het Huus van de Taol en giet over Drenthe, heur inwoners en heur verhalen. René Edens is veiligheidskundige en al 23 jaor bij de brandweer in zien woonplaots Börger. Ok speult e teniel en giet e geregeld met de metaaldetector op pad.

,,‘Och’, zee mien vrouw toen ik vraogd weur veur de brandweer, ‘o’j der nou achteran riedt of derbij in zit, dat mak weinig oet’.” René Edens (51) lacht. ,,De brandweer he’k altied interessant vunden. Ik gung der eerder geregeld op de brommer achteran um te kieken waor ze hen gungen.”

23 jaor ervaring en verscheidene opleidingen later is e bevelvoerder bij de vrijwillige brandweer in Börger. Deur het brandweerwark is e oeteindelijk ok veiligheidskundige worden. Het bedrief waorveur e warkt verzörgt veiligheidsopleidingen en -cursussen veur schoelen en bedrieven.

loading

‘Wiezer en weker’

As bevelvoerder is Edens de baos as de brandweer oetrukt. Hij hef contact met de meldkamer, die ze hen de locatie van een brand of ongeluk stuurt. ,,De N34 löp deur oes gebied, dus wij hebt al hiel wat ongelukken metmaakt. As daor wat gebeurt, is het vaak goed mis.”

As in hoes zien pieper afgiet, stiet e twei minuten en twintig tellen later in pak naost de brandweerauto, klaor veur vertrek. ,,Ongelukken met kinder bint het slimst. Aj older wordt en zölf kinder hebt, woj wiezer, maor ok weker. Een ongeluk bij Oring roem tien jaor leden waorbij een mamme en kind bij umkomen bint, vergeet wij as team nooit weer.”

‘Meer as collega’s’

Nao heftige incidenten hebt ze altied een naobespreking um dingen te kunnen verwarken. ,,Wij belt mekaar de aandere dag ok nog even um te heuren hoe ‘t giet. Wij bint veul meer as collega’s.” Het brandweerwark is e nooit zat, zeg e. ,,Ik kan mij gien leven zunder de brandweer veurstellen.”

De inzet nao de vuurwarkramp in Enschede hef veul indruk maakt. ,,Wij waren daor um het team te understeunen dat naor slachtoffers zöcht under het puun. Een collega en ik kwamen bij het rampgebied een vrouw tegen die weten wol of heur hoes der nog stund. Zie har heur paspoort neudig, umdat ze trouwen zul gaon. Wij hebt heur hoes opzöcht. Dat was der nog. Toen wij heur het paspoort gaven, mus ze verschrikkelijk schreien.”

Pensioenspitters

Um te ontspannen giet Edens geregeld met kameraoden met de metaaldetector op pad. ,,Wij nuumt oeszölf de pensioenspitters. Oes pensioen zit in de grond en daor moew het vorthalen”, gnis e.

Teniel is nog zu’n hobby waor e gek van is. As corona-alternatief veur de jaorlijkse oetvoering van de Rederijkerskamer hef e met wat plaotsgenoten  Op de Gribbelgrab  bedacht. ,,Een wandeling van een paar kilometer met tenielstukkies underweg. Wij hebt het in augustus zes keer daon en waren alle keren oetverkocht. Dat kreg een vervolg.”

Allewal het Drèents hum van hoes oet niet met de paplepel ingeuten is – zien pap is Duuts en zien mam een Grunningse – hef e het as kind wal al leerd. ,,Ik bin een trotse Drent en praot haost altied in de streektaol. Binnenkört gaow hen Tussen Kunst en Kitsch met een golden ring die ik met mien metaaldetector vunden heb. Ik bin der een beetie bang veur dat ze mij gaot undertiteln a’k op tillevisie kom.”

menu