Hier kom ik weg: 'Het kost tied um te verwarken dat alles vort is'

Roy Keuter begunt met kleine optredens in het Veenpark, waor e as tiener warkt. Foto: Laura Marij Photograpy

De rubriek Hier kom ik weg is een samenwarking met het Huus van de Taol en giet over Drenthe, heur inwoners en heur verhalen. Roy Keuter (40) oet Emmen is al roem twintig jaor bekend as DJ Roy. Hij drèeide in binnen- en boetenlaand en 2020 zul zién jaor worden. Hoe aans leup het, deur corona. Nou zit e in de zunnepanelen.

Want mamme see: ‘Denk veur het slaopen in joen bed, haanden veur joen oogies, an de dreum die je hebt…’ De woorden oet de hit Mamme see van Isa Zwart zet Roy Keuter in 2016 op papier. ,,Mien mamme hef altied zegd dat, a’k diskjockey worden wol, ik daor elke aovend veur het slaopen gaon hiel hard an denken mus. Dan zul het oetkommen.”

Ze kreg geliek. Op zien 10de begunt e met het opnimmen van muziek van de radio op cassettebaandties die e dan mag drèeien in de jeugdsoos in Barger-Oosterveld en nou - dartig jaor later - hef e as DJ Roy hiel Europa zien en met beroemde dj’s als Tiësto, Mental Theo en Armand van Helden drèeid.


Keuter begunt met kleine optredens in het Veenpark, waor e as tiener warkt. ,,Op een bepaald moment mug ik alle zundagen drèeien in de Boogie Bar bij oes in Barger-Oosterveld. Die zat dan ramvol. Fantastisch!”

loading  

‘Stottern giet over met microfoon in de haanden’

Op zien 18de komp e in contact met een discotheekeigenaar oet de dan populaire Spaanse badplaots Salou. ,,Ik mug solliciteren, maor ja, ik stotter.” Een paar vriendinnen wilt hum helpen. ,,Ik heb ze vraogd um tiedens het gesprek, dat ik har in café De Brasserie in Emmen, een keer langs oes te lopen en te zeggen: ‘Goh, wat hej gisteraovend goed drèeid’. Grijnzend: ,,Ie moet toch wat?!”

Hij wordt annummen en Salou wordt het startpunt van een jaorenlange dj-carrière in hiel Europa. Stottern döt e as dj niet. ,,A’k een microfoon in haanden heb, is het over. Dan heur ik mijzölf terug en dat helpt.”

Keuter stiet bekend as party-dj . Daornaost warkt’e acht jaor lang bij radiozender Simone FM. De leste jaoren stiet e veural op festivals in Nederland, waor e ok aal meer hardstyle-muziek drèeit. ,,Maor wal vrolijke muziek. Mèensen moet met een glimlach in het publiek staon. Op het podium geef ik alles. De energie die aj derin stopt, kriej altied weerum van je publiek. Dat is geweldig.”

‘Beide bienen op de grond’


In Barger-Oosterveld komp e nog altied geern. ,,Aj even denkt daj hiel wat bint, wordt dat daor geliek ofstraft. Daor is al gauw iene die zeg: ‘Ie kunt wel denken daj populair bint, maor ie moet gewoon normaal doen. Gewoon met de beide bienen op de grond’. Haha, dan is ’t klaor.”


Dit jaor zul Keuter veur het eerst meer as tweihonderd optredens geven en der zul een plaot van hum oetkommen. Maor nou warkt e ‘in de zunnepanelen’, umdat deur corona alles ofzegd is. ,,Alles is vort. Mien baan en passie en daormet een stuk van wel ik bin. Een hiel grote umschakeling. Dat kost tied um te verwarken.”

Hoe lang het duurt veur e weer veur een dansende massa staon kan, wet gienien. Drèentse liedties schrieven döt e nog wal. ,,Van hoes oet heb veul nuchterheid metkregen. Ik weet dat der altied mèensen bint die as het minder hebt as ik.”

menu