Hier kom ik weg: 'Het vuult asof ik dit jaor vanneis geboren bin'

Hier kom ik weg

De rubriek Hier kom ik weg is een samenwarking met het Huus van de Taol en giet over Drenthe, heur inwoners en heur verhalen. Dat bakker Jordy Schepers oet Witteveen in het verkeerde lichaam geboren was, wus zie zölf al langer. Het was een hiele stap um het hen boeten te brengen, maor nou is zie in transitie en stiet der een ‘V’ in heur paspoort.

,,Ik weet nog dat ik mien eerste rokkie kocht. Zo spannend vun ik dat. Het wichie achter de kassa zee: ‘Veul plezier dermet’ toen ik betaald har. Ik dacht: zul ze deurhebben dat e veur mijzölf is?”

Jordy Schepers (30) hef jaorenlang worsteld met zuchzölf. Op zien 18e nam e as jonge kerel de bakkerij in Witteveen, met winkels in Börk en Beilen en riedende winkels in de boetendörpen, over van zien olders. ,,’En nou is oeze bakker een bakster’, zoas ien van oeze klanten tegen mij zee”, lacht ze.

loading  

Vrouwenkleren

,,Ik was een jaor of 7 a 8 toen ik markte da’k aans was as aandere jongen. Toen ik wat older weur, gung ik kleren dielen met mien zussie Marlieke. Later dreug ik hiel vaak vrouwenkleren under mien mannenkleren. Dat he’k ik wal een jaor of twaalf daon. Gienien die het wus.

Schepers verschoelt zuch deur de jaoren hen een beetie in zien bedrief. Met veertig metwarkers en een koppel winkels en marktkramen is der ja altied wat te doen. In het naojaor van 2018 is e der veur zuchzölf oet; hij wil vrouw worden. ,,Toen he’k het verteld an familie en vrienden en bij Witteveense Boys, de voetbalclub. Echt gienien har het an zien kommen.”

Kaorten en bloemen

De grootste stap is um het zien klanten te vertellen. Schepers is bang dat ze zien keuze niet accepteert en niet weerkomt. ,,Ik heb een brief schreven. Op oldjaorsdag 2018 hebt de metwarkers die an de klanten metgeven. Zölf stun ik de hiele dag euliebollen te bakken, tot ’s middags een collega mij met hen boeten nam. Daor stun een auto vol met kaorten en bloemen. Allemaol steunbetugingen van mien klanten. Ik was overdonderd. Toen wus ik: mèensen holdt ondanks mien keuze wal van mij.”

Ofgelopen jaor mus Schepers allemaol testen doen en is ze begeleid deur een psycholoog. ,,Vlak veur de zommervekaansie kun ik begunnen met de hormoonbehandeling. Hiel bijzunder wat die hormonen doet. Mien hiele lichaam veraandert en ik krieg meer vrouwelijke vörmen. Het is nou te vergelieken met een wichie van umdebij 12 jaor.”

KNVB-ambassadeur

Ze stiet op de wachtliest veur een operatie um van geslacht te veraandern. ,,Gelukkig bin ik in mien paspoort al vrouw. Daormet kan ik officiële voetbalwedstrieden speulen met het dameselftal. Het vuult asof ik dit jaor vanneis geboren bin.”

Schepers is ok ambassadeur diversiteit veur de KNVB. Zie voetbalt naost Witteveense Boys nou ok bij VKW in Börk. ,,Ik bin dizze zommer deur een paor wichter vraogd en bin daor met open armen ontvangen. Dat hef mij hiel goed daon.”

De naam van het bakkersbedrief blef haost zeker Jordy Schepers, maor zölf wil ze wal een aandere naam. ,,Ik heb der drei in mien heufd die ik mooi vind en die laot nog even bezinken. Hij mut in elk geval bij Marlieke passen.”

menu