Hier kom ik weg: 'Ik doe nou alles vanoet mien hart'

Hier kom ik weg

De rubriek  Hier kom ik weg  is een samenwarking met het Huus van de Taol en giet over Drenthe, heur inwoners en heur verhalen. Het leste jaor hef Annemiek Drenth oet Emmen een grote ummezwaai maakt. Ze zee heur bakkerij vaarwel en is nou drok as trouwambtenaar, zangeres in de streektaol en spreker op oetvaarten.

,,Ik zag een trouwambtenaor op een huwelijk waor ik optreden mus en dat leek mij wal wat. A’k der nou ok bij gao zingen, dacht ik, zul dat wat wezen? Ik gung op cursus en kreeg as advies um op Facebook te zetten waor ik mit gangs was. Twei week later har ik mien eerste anvraog binnen.”

Het giet Annemiek Drenth (33) wal aordig rap, maor ze hapt toe. En zo döt ze veurig jaor heur eerste ceremonie en giet ze nou deur het leven as zingende trouwambtenaor. Zie warkt veur de gemiente Stadskanaal en is daornaost as zölfstandige deur het hiele laand.

Dat har ze veurig jaor niet bedenken kund, toen ze stoppen mus met heur bakkerij op Emmer-Compas. Rugklachten dwungen heur een aandere weg in te slaon. ,,Ik bin mien hele leven al met muziek in de weer, in koren en coverbands. Daor wol ik wal wieder met.”

Drèents zingen

Bij het Drèents Liedties Festival in 2012 dat zie oeteindelijk wint, zingt Drenth veur het eerst in de streektaol. ,,Dat smaakte naor meer en zo is het ballegie gaon rollen.” De leste tied hef ze een vaste gitarist met wel ze optredens gef, ok bij huwelijksvoltrekkingen.

loading  

De coronaoetbraak was schrikken. Ze har juust heur neie bedrief an de loop en toen vuul alles stil. ,,Gelukkig kun ik bij het restaurant van Hunebed City in Börger an de slag. Daor wark ik met mèensen met een arbeidsbeparking. Wat een energie krieg ik daorvan, magnifiek!”

'Dankbaor wark'

Nou de maatregeln versoepeld bint, hef ze het dubbel zo drok, maor klagen döt ze niet. ,,Mien leven is in een jaor tied 180 graoden dreeid. En allewal de bakkerij mien passie was, is dit een nóg grotere passie. Ik doe nou alles vanoet mien hart en het lek vanzölf te gaon.”

Spreken op oetvaarten is ok underdiel van heur wark. ,,Net as bij trouwen giet het dan ok over liefde en het leven. Het is hiel dankbaor wark. Of ik wal ies zölf schreien moet? Dat gebeurt mangs. En waorum ok niet? Het bint altied verdrietige momenten. Niet vrumd toch dat ik mangs ok wat van de kaort bin?”

Trotse Drent(h)

Vanof volgende maond is zie samen met aandere Drèentse artiesten te zien in het programma Drentse Zangers van ZO!34, een variant op Beste Zangers. Alle liedties die ze daon hebt, waren in het Drèents. ,,Wat ik jammer vind is dat de taol vaak als olderwets zien wordt. Dat klopt niet. Het is van nou en kan juust hiel verfrissend wezen.”

,,Ik vind het belangriek dat jongern kennismaakt met de taol en die niet ziet as een belemmering. Daorum bin ik ok streektaolambassadeur in Emmen worden veur het Huus van de Taol. Ik kan wal zeggen da’k een trotse Drent bin en niet allent deur mien naam.” En de liefde? Die hef ze zölf nog niet vunden. Lachend: ,,Ik bin een goeie ambassadeur veur de liefde van een aander.”

menu