Hier kom ik weg: 'Ik vuul mij intens gelukkig op een podium'

Martin van Polen.

De rubriek Hier kom ik weg is een samenwarking met het Huus van de Taol en giet over Drenten en heur verhalen. Martin van Polen oet Tweide Mond prat, deenkt en zingt as het even kan in de streektaol. Zien dochter Karlijn, die haost 2 jaor is, voedt hij en zien vrouw Magda twietaolig op: hij prat Drèents, zien vrouw Nederlands.

loading

,,Wij hebt an taofel de biezundere situatie dat ik Nederlands praot met mien vrouw en Drèents tegen mien dochter. Der bint meer olders die juust Nederlands praot tegen de kinder.” Martin van Polen (36) lacht. ,,Mien vrouw is geboren in Polen en boeten Drenthe opgruid, dus zij prat Nederlands, maor ze vindt het mooi dat ik de streektaol deurgeef.”

Zölf is e ok opgruid met de streektaol. In hoes weur Veenkoloniaol Drèents praot. ,,Mien pap zee altied: ‘Ik bin schilder en gien leraar Nederlands, dus ik stuur je naor een schoel, waorvan ik verwacht dat ze je dat leert’ Ik heb altied hoge ciefers op Nederlands haald. Mien mam hamerde der ok op da’k goed mien best doen mus, juust vanwege het veuroordiel daj dommer bint aj Drèents praot.”

‘La’ en ‘lao’

,,Het verhaal over daj een taolachterstaand kriegt aj in hoes Drèents praot, is ok allang achterhaald. Oeze hoesarts zee dat kinder tot 7 jaor met gemak drei verschillende taolen naost mekaor kunt leren. Meertaoligheid is goed veur de ontwikkeling van de harsens. Oeze dochter löp veur op het gebied van taolontwikkeling zeden ze op de kinderopvang en het consultatiebureau.”

Karlijn prat zölf miest Nederlands, maor begrep het Drèents wal. ,,A’k over stoet begun, pakt zie brood. Sukelao hef ze lange tied ‘la’ nuumt, maor dan zee ze tegen mien vrouw ‘la’ en tegen mij ‘lao’. Knap toch dat zulke jonge kinder dat verschil in taol al deur hebt!”

Ok op het wark bij een bouwmarkt in Emmen prat e Drèents as ’t maor even kan. ,,A’k een klant help en ik vernim dat e Drèents prat, doe ik dat ok. Dat vuult toch meer eigen.”

Drèentstaolige country

Muziek is zien grote hobby. Van Polen hef as gitarist in meerdere coverbands speuld en treedt tegenwoordig samen met plaotsgenote Lilian van Lottum as duo op. ,,Zij is een country-wichie. Deur heur heb ik die meziek ok meer ontdekt. Wij zingt twiestemmig en ik speul gitaar. Wij doet covers, maor schrieft ok samen Drèentstaolige countrynummers. Echte luusterliedties.”

Met zien beiden optreden is kwetsbaorder en spannender as optreden met een band, waor een foutje veul minder opvalt, zeg e. ,,Maor podiumvrees he’k nooit had. Ik vuul mij intens gelukkig op een podium. Nou alles stil lig, mis het echt ontiegelijk.”

‘Taol in staand holden’

Van Polen is ok nog streektaolvrijwilliger bij het Huus van de Taol. ,,Ik wil der alles an bijdragen dat de streektaol in staand blef en dan veural under kinder. Ik vind het allent al mooi dat het Nedersaksisch zoveul varianten hef, maor daw mekaor toch allemaol verstaon kunt.”

Taol hef veur hum hiel veul met gevuul te maken. ,,Het stek mij wal ies daw tegenwoordig trots bint op Drenthe en alles wat hier is, behalve op de taol. Daor liekt veul mèensen zuch veur te schamen. Ik hoop dat der meer olders opstaot die ok Drèents praoten gaot tegen heur kinder.”

Je kunt deze onderwerpen volgen
Drenthe