Hier kom ik weg: Jan van Goor, van slager tot anjager in Zuudwest-Drenthe

De rubriek Hier kom ik weg giet over Drenthe, heur inwoners en heur verhalen. Illustratie: Dagblad van het Noorden

De rubriek Hier kom ik weg is een samenwarking met het Huus van de Taol en giet over Drenthe, heur inwoners en heur verhalen. Jan van Goor was keurslager, maor keus op zien 45ste veur een aandere toekomst. Hij stund an de basis van de Gebiedscoöperatie Zuidwest-Drenthe, waor e non vief jaor coördinator is.

Jan van Goor (61) oet Zuudwolde hef een groot hart veur de regio en veur pionieren. Dat mark ie gauw aj hum spreekt. Hoe kuj Zuudwest-Drenthe op allerlei gebied leefbaar en antrekkelijk holden en daormet op de kaort zetten; daor dreeit het um in zien wark as gebiedscoördinator.

In 2003 hung e zien slagersmes an de wilgen. ,,Umdat de markt veraanderde vreug ik mij of wat de functie van oeze slagerij in Zuudwolde in de toekomst wezen zul. Der was nog een aandere slagerij in het dörp en twee supermarkten met slagers derin. Ik was 45 en dacht: a’k wat wil, mut ik nou wat veraandern.”

loading  

Beurs veur undernimmers

Hij stopt en giet as zzp’er in de vleesindustrie warken, waor e fabrikanten advies gef over neie producten. Daornaost zit e in de undernimmersverieniging in Zuudwolde. Het zaodtie veur de Gebiedscoöperatie Zuidwest-Drenthe wordt plaant as die verieniging een beurs holdt waor lector Coöperatief Duurzaam Ondernemen Willem Foorthuis sprek. ,,Hij preut under meer over krimp en vergriezing. Nao tied zeden collega-undernimmers tegen mij dat wij daor wieder met mussen.”

Samen met gemiente De Wolden en MBO Terra holdt de undernimmers thema-aovends over bijveurbeeld energie, gezondheid en economie. Dat mondt in 2015 oet in de gebiedscoöperatie, die mandielige projecten van undernimmers, overheid, underwies en omwonenden giet organiseren en anjagen met Van Goor as kartrekker.

Bermgres en Dubbel Drents

Het glasvezelproject in De Wolden, waorbij inwoners geen ansluutkosten betalen huuft, wordt een succesverhaal. Wieder is de coöperatie drok met een project rondum bermgres. Het gemeeide gres, waor gemientes weinig met kunt, kan in verscheiden producten verwarkt worden. Eierdeuzen en plaatmateriaal bint veurbeelden. ,,Het is een speurtwark, waorbij aj mut blieven kieken wat veur meugelkheden der bint um producten in de markt te zetten”, zeg Van Goor.

Het mark Dubbel Drents komp ok oet zien koker. Drèentse akkerbouwers levert heur graan an Drèentse bakkers, die het verwarkt tot brood dat op 31 plekken in de provincie verkocht wordt. ‘Dubbel Drents’ slat op maakt en verkocht in de regio. En zo bint der ok al Dubbel Drents bier, kees en asperges.

‘Minder gesleep’

,,In Möppelt zit een bedrief dat gruunte snedt, waorvan de eigenaar elk jaor zes ton asperges oet Zuud-Nederland haalde. Wij hebt hum in contact bracht met telers oet de regio, waordeur het product nou in de regio blef. Zo hej minder gesleep met voedsel, waordeur het ok duurzamer is.”

Neie producten en neie vörmen van regionale samenwarking, daor dreeit het veur Van Goor um. ,,Sommigen ziet het neie as een bedreiging, ik zie kaansen. Het is mooi um met undernimmers daornaor te kieken. Altied weer zuken naor neie meugelkheden is de oetdaging.”


menu