Hier kom ik weg: 'Mèensen bint verrast dat ik Drèents praot'

Hier kom ik weg - Gea Habers.

De rubriek Hier kom ik weg is een samenwarking met het Huus van de Taol en giet over Drenten en heur verhalen. Gea Habers van Schonnerd is kandidaat-notaris in Coevern. Ze stiet heur klanten, as die dat wilt, in het Drèents te woord. ,,Niks is mooier as dat ze weggaot en zegt: ‘Nou snap ik het’.”

loading

As wichie dat van peerdrieden huul, was het de dreum van Gea Habers (50) um bij de bereden politie te gaon. ,,Maor a’k nou die rellen op tv zie, bin ik bliede dat dat niet deurgaon is”, zegt ze op kantoor bij Veen & Veste Notarissen in Coevern.

,,Toen ik klaor was met de havo in Emmen weur ik wegstuurd bij de politie: ik was te jong.” Ze döt dan nog vwo en probeert het daornao bij de recherche, maor daor gebeurt hetzölfde. Dan kös ze veur een studie rechten in Grunning. ,,Het was een beste overgang van de boerderij op Padhuus, waor ik opgruid bin, naor de stad. Ik har in het begun een hiel klein kamertie en heb mij wal ies knap ongelukkig vuuld.”

Maor nao ien jaor möt ze een studierichting kiezen en veraandert alles. ,,Ik keus veur notarieel recht, een kleine studie met maor zestig studenten. Het was daordeur aordig schoels; dat paste mij veul beter. Niet het massale van een studie strafrecht, wat haost iederien doen gung.”

Metlopen in Coevern

Um derachter te kommen wat de notarispraktiek inholdt, giet ze hen het notariskantoor Coevern. ,,Ik heb vraogd of ik metlopen mug en dat kun. Ik mug ok geliek metkieken in de boedelpraktiek. Dus as der iene oet de tied kwam en der mus een hoes leeghaald worden, dan mug ik met.”

Ze vuult zuch as een vis in het water. Heur opleider is een notarisklerk die Drèents prat, zoas veul meer kantoorgenoten in die tied doet op het kantoor, waor Habers nou nog altied warkt. Het maakt de drömpel veur mèensen um hen de notaris te gaon miesttieds leger, is Habers’ overtuging. As ze markt dat mèensen in de streektaol praot, döt ze het zölf ok.

Neuzen dezölfde kaant op

Sinds 1994 is ze kandidaat-notaris. ,,Mien specialisatie is personen- en familierecht en ik heb een grote veurliefde veur het ofwikkeln van boedels”, lacht ze. Ze zöt geregeld families die stried hebt um een arfenis. ,,Ik mag niks liever doen as ruzieboedels ofhandeln, waorbij niet alle neuzen dezölfde kaant op staot. Ik probeer dan te bemiddeln um ze wal ien kaant op te kriegen. En daorbij observeer en luster ik hiel goed, um oet te zuken wat der speult. Daor kriej vuulsprieten veur.”

De moeilijke taol en begrippen bint veur veul mèensen een reden um niet geern hen de notaris te gaon. ,,Veur sommigen is het echt een verrassing as ik Drèents begun te praoten, maor der bint ok mèensen die hier speciaal komt umdát ik plat praot. Dat is toch prachtig?”

Behalve dat ze klanten in heur eigen taol anspreken kan, tiekent Habers ok vaak dingies um heur verhaal oet te leggen. ,,As mèensen nao een gesprek weggaot, zegt ze wal ies dat ze der tegenop zagen um te kommen. ‘Wij hebt der niet veur studeerd en dachten: wij snapt het vast niet. Maor zoas ie het oetlegt, begriep wij het’.” Habers straalt. ,,Mooier is der ja niet!”

Je kunt deze onderwerpen volgen
Drenthe