Hier kom ik weg: 'Niet het gevuul dat ik mien kind tekört doe met Drèentse opvoeding'

Linda Strijk en haar dochtertje Quinne. Foto: DVHN/Jeroen Kelderman

De rubriek Hier kom ik weg is een samenwarking met het Huus van de Taol en giet over Drenthe, heur inwoners en heur verhalen. Linda Strijk-Bruins (35) oet Eext voedt heur 6-jaorige dochter Quinne samen met heur man Drèentstaolig op. ,,Nederlands hef ze op schoel leerd, net as ik vrogger. Ik heb daor nooit last van had.”

loading  

Heur hele leven woont Linda Strijk, leerkracht op de Bonnerschool in Gieten, al in Eext en Drèents praoten hef ze altied al daon. ,,Mien olders preuten gien Nederlands tegen mij en mien zus. Mien pap kun zuch der ok altied vreselijk an argern as mèensen, die zuch drok meuken um de streektaol, tegen heur eigen kinder gien Drèents preuten.”

Schötteldoek

Het Nederlands leren op schoel gung vanzölf, veur zover Strijk zuch herinnert. Ze heurde de taol ok al op tillevisie en de peuterspeulzaal. ,,Ik weet nog wal dat mien juf in groep 3 mij een keer vreug of ik het vaatdoekje even wol pakken. Toen heb ik heur wat glazig ankeken, denk ik, want al gauw zee ze: ‘Linda, pak de schötteldoek maor even.”

Heur dochter Quinne ok Drèentstaolig opvoeden, is veur Strijk een logische keuze. ,,Ik bin der zölf best trots op en vind het mooi da’k het spreek. Aj der as kind negatieve ervaringen met had hebt, kan ik mij veurstellen daj het niet doet, maor dat heb ik niet. Ik heb niet het gevuul dat ik mien kind tekört doe. Meertaoligheid is tegenwoordig ja hiel normaal en nog goed veur de harsens ok.”

Niet veur iederien is het altied logisch. ,,’U voedt uw kind Drentstalig op?’ vreug een medewerkster van het consultatiebureau me een paar jaor leden toen ze mij tegen Quinne heurde praoten. ‘Daar maak ik even een aantekening van.’ Toen gungen mij de haoren recht overend staon.”

Umschakeln

Met vriendinnegies prat heur dochter Nederlands, net as Strijk zölf met de miesten eerder. ,,Ik zat een keer met een paar meiden bij mien mam in de auto en preut met heur Nederlands en tussendeur Drèents tegen mien mam. ‘Hoe denk je daar zo snel over na?’ vreugen mien vriendinnen. Maor dat dee ik niet. Dat gung vanzölf.”

An Quinne markt Strijk wal dat ze even möt umschakeln as ze net van schoel komp. ,,Dan prat ze eerst nog even deur in het Nederlands. Dat dee ze lest ok toen wij weerkwamen van een vekaansie op Curaçao. ‘Wat praat jij raar. Opa kan je niet verstaan’, zee mien pap tegen heur. Ik zag heur dèenken en toen vreug ze: ‘Opa, gao wij zo nog even bij de kip… euh bij de tuuties kieken?”

Juf in de dop?

Strijk lacht vanneis. ,,Ze was lest heur neefie van bijna 4 ok al Drèents an ’t leren. ‘Hij kan al tot tien tellen. Volgende keer doew tot twintig’, zee ze. Haha, het zul maorzo kunnen dat ze op mij lek, maor ze blef der wal bij dat ze later gien juf wordt. Ze wil leeuw worden.”

Quinne in de streektaol opvoeden döt Strijk ok wal een beetie vanoet de gedachte um de taol limtig te holden, zeg ze. ,,Al weet ik ok wal dat kinder het haost niet meer kunt. Aw wilt dat der over honderd jaor nog Drèents praot wordt, möt der nog hiel wat gebeuren.”

Je kunt deze onderwerpen volgen
Drenthe
menu