Hier kom ik weg: 'Veul te nuchter um een diva te wezen'

Hier kom ik weg

De rubriek Hier kom ik weg is een samenwarking met het Huus van de Taol en giet over Drenthe, heur inwoners en heur verhalen. Carina Vinke wet niet aans as dat der vrogger thuus zungen weur. En ze har talent. De overstap van het plaotselijke kinderkoor op Erica naor het Nationaal Kinderkoor in Utrecht was dartig jaor leden het begun van wat een internationale carrière zul worden.

Gedwee laot de schaopen an de raand van het Bargerveen zuch de kooi in drieven. Carina Vinke genöt zichtbaar. ,,Aj het nou hebt over ‘Hier kom ik weg’, dan is dit wal een hiel goede plek. Mien opa Vinke was hier as veenbaos gangs met het ofgraven van het Bargerveen. Dus ja, mien roots ligt echt hier.”

Deurdat ze as peuter op ballet giet, komp ze al vrog in anraking met klassieke muziek. As ze met negen jaor auditie döt bij het Nationaal Kinderkoor vindt ze het prachtig um zölf klassiek te gaon zingen. „Ik mus wal van wat wieder kommen. Veul aandere kinder hadden olders in het vak en kunden al noten lezen. Ik har die achtergrond niet.”

loading  

Gien twiefels

Het jeugdkoor hef optredens in binnen- en boetenlaand. Vinke döt veul ervaring op en is wieder drok met zang-, dans- en teniellessen. Op heur vieftiende verruilt ze het olderlijk hoes deurdeweeks veur een gastgezin in Delft. Zo kan ze de veuropleiding van het Koninklijk Conservatorium in Den Haag doen.

Ze mak lange dagen, maor hef het arg naor de zin. „Aj der aordigheid an hebt, is het gien issue of iets veul tied kost. Ik vun het geweldig en heb nooit twiefeld o’k deurgaon wol. Ik zat tussen geliekgestemden, mèensen die musiceren allemaol mooi vunden.”

Hysterische vrouwen

Non, op heur 39ste, hef Carina Vinke over de hiele wereld optreden: van Japan tot Mexico. Ze wisselt opera’s of met concerten met orkesten. „Ik zing veul Mahler en Wagner bijveurbeeld. Ik bin alt, maor zing ok mezzosopraanpartijen. Ik vind het fijn om midden en leeg te zingen met mangs van die dramatische hoge noten tussendeur. Ik speul ok vaak van die hysterische vrouwen in opera’s, dat mag ik hiel geern doen, haha.”

Internationale carrière of niet, een diva is ze nooit worden. Lachend: „Daor bin ik te nuchter veur. Mien generatie kan zuch ok gien divagedrag veroorloven. Dan wordt wij nooit weer vraogd.”

Nao twintig jaor Den Haag woont Vinke weer op Erica; een man en twee kinder rieker. Naost heur wark as zangeres gef ze zanglessen en workshops an koren en is dirigente van het Emmens Mannenkoor. Het coronavirus is ok veur heur een hard gelag. „Ik zul dit jaor veur bijveurbeeld het eerst optreden in New York, maor sinds 15 meert lig alles stil.”

Paniek en rouw

„Nao de paniek deur alle ofzeggingen kwam der rouw omdat ik zoveul mooie dingen misleup en 80 tot 90 procent van mien inkomsten. Van meert tot juli he’k niks aans daon as proberen mien bedrief te redden. Tot ik besleut mijzölf veur het eerst in jaoren ies vakantie te geven. Toen kwam der rust.”

Zun

Nou komp der weer ideeën en mak ze toekomstplannen. „Zingen mag weer en langzaaman komt der neie opdrachten binnen. We hebt veul zun had de leste tied. Laow hopen dat het op warkgebied ok gauw weer zunniger wordt.”

menu