Hier kom ik weg: Arja Olthof van Huus van de Taol wil vol inzetten op Nedersaksische samenwarking

De rubriek Hier kom ik weg giet over Drenthe, heur inwoners en heur verhalen. Illustratie: Dagblad van het Noorden

De rubriek Hier kom ik weg giet over Drenthe, heur inwoners en heur verhalen. Het is een samenwarking met het Huus van de Taol. Arja Olthof is daor sinds veurig jaor streektaolfunctionaoris. Ze prat elke dag Drèents. Maor schakelt net zo makkelijk over naor het Twents, het Duuts en het Nederlands.

Het was of de vacature veur streektaolfunctionaris veur heur schreven was. ,,Het Huus van de Taol zöcht iene die affiniteit har met taol en streektaol, met underwies en in mien leeftiedscategorie. Ik kun alles afvinken”, lacht Arja Olthof (37) oet Fluitenbarg. ,,As ik niet solliciteer, gao ik het mijzölf nooit vergeven, dacht ik.” En zo begunde de geboren Twentse nao dartien jaor in het middelbaar underwies in september an een neie avontuur.

Op heur negende verhoest Olthof hen Neilande en gruit daor op met een neie streektaol. Ze blek opiens een ‘maagie’ te wezen en de kinder op schoel vraogt aal waor ze ‘weg’ komp. De Twentse tongval lek tegenwoordig hielemaol vort. ,,Maor a’k ien voet over de drempel zet bij mien pap en mam, praot ik weer plat Twents”, lacht ze.

loading

Passie overbrengen

Nao heur studie Duutse taol & Cultuur, belandt Olthof veur de klas. Heur passie veur taol overbrengen op aandern is heur doel. Dat dat is met heur overstap naor het Huus van de Taol in Beilen niet veraanderd. De ofgelopen tied is ze inwarkt deur Jan Germs, die ankommend zommer met pensioen giet.

Olthof: ,,Hij hef alles opzet, zoas het fantastische vrijwilligersnetwark, cursuswark en contacten met schoelen. Unbetaalbaor.” Intussen underholdt ze zölf de contacten met allerlei streektaolorganisaties, is ze drok met underwiesprogramma’s en helpt ze mèensen met vraogen over de streektaol.

Jongeren anspreken

Deur de overheidserkenning van het Nedersaksisch zit de streektaol in de lift, markt ze. ,,Ik wil geern dat oeze samenwarking met andere streektaolorganisaties in Noordoost-Nederland hechter wordt. Daor moew vol op inzetten.”

Ok wil ze zuch vanoet heur achtergrond meer richten op Drèents in het middelbaar underwies. Wieder kan der op digitaal gebied nog veul meer. Olthof: ,,Wij kunt lesmethodes, maor ook cursussen veur volwassenen digitaal anbieden. En hoe en waormet spreek ie jongeren an? Welk advies geef ie an jonge olders die vraogt hoe het warkt um heur kind tweetaolig op te voeden? Dat is ok een gat waor directeur Renate Snoeijing en ik geern in wilt springen.”

Imago veraandern

Meertaoligheid en de veurdielen daorvan boeit Olthof. ,,Taol hef hiel veul met identiteit te maken. Ik vraog mij of waorum der nog aal mèensen bint die denkt dat het praoten van streektaol te maken hef intelligentie en iets van vrogger. Dat imago mut echt veraandern. Streektaalsprekers mut drempels veur neie sprekers vorthalen en neie sprekers mut meer duren en doen.”

Der bint hiel veul mèensen die zegt dat ze gien Drèents kunt. Ammehoela, vaak duurt ze niet of hebt ze het spreken niet leerd, maor verstaot ze het best. Daor een kanteling in kriegen, is verrekte moeilijk. Maor ik wil het wal doen.”

menu