Angenaom en nuttig

Logo. Huus van de Taol

Ina de Groot is streektaalvrijwilligers van het Huus van de Taol en woont in Bovensmilde. Zij schreef een column in het Drents:

Het bestuur van Vrouwen van Nu uut Bovensmilde vun het weer ies tied worden om de koppen bij mekaar te steken en te kieken of ze de leden nao een lange tied van ofwezigheid op een gezellige middag kunnen trakteren.

Eerst mor ies vraogen an oeze kroegholder of wij daor terecht kunt met ruum 20 vrouwen. Gelukkig was dat gien probleem. Alle leden kregen een briefie in de bus met de vraog of ze het andurven om met mekaar een koppie koffie te drinken en bij te praoten.

Wat waren ze bliede om mekaar weer te treffen. Want ja, deur dat gedoe met dat vervelende virus hadden ze mekaar een hiele schoft niet zien en spreuken.

Zo praotendeweg komt der mooie ideeën op taofel. Wat kunt wij as vereniging bijdragen an oeze gemienschap?

As ie kiekt wat veur zwarfofval der bij de weg, in de sloten en in de bossies achterlaoten wordt, dan stijgt je het schaomrood nor de kaoken. Wij hebt contact zöcht met “De Smildes Schoon”, een groepie vrijwilligers die daogelijks de stried angaon met dit zwarfofval.

Op 19 september hebt wij met 3 vrouwen en 9 aandere vrijwilligers, het was een gezellige boel, straoten, sloten, bossies en parkies in Smilde ofstruund. Oh, oh mensen, wat bint wij viespeuken. Nou ik het toch over peuken heb, een paar honderd hebt wij der oppakt. Etensresten, blikkies, bouwpuun, kinderjassies, ie kunt het zo gek niet verzinnen of het lag derbij.

Naodat wij een beste bulte ofval verzameld hadden kregen wij, as dank, frisdrank, stoet met koffie, sukkelaomelk en ook nog een lekkere reep sukkelao met hen huus.

Wij, Vrouwen van Nu gaon dit vast nog ies doen, mor dan geern in oez eigen dörp.

Wat betièken veur de gemienschap, hoe mooi is dat. Dat is ok ien van de missies van de Vrouwen van Nu.

Dus, as ie vrouw bint en de handen wilt laoten wapperen en nog gien lid bint van V.v.N, ie bint van harte welkom.

menu